Méo lé né Larényon, li la grandi Sinpyèr kapital lo sid, ousa li abit ankor ziskalèr. Dopi marmay li biny dan bann zilistrasyon, li inm désin, parlfèt li la fé zétid « arts appliqués ». 1993, la li komans poudbon, dann somin an promyé, pou apré komans akapar dsou bann pon Sinpyèr pou byin fé lamin. Dousman-dousman, li trouv son stil, son koudpat. Son bann portré, son bann dékor lé fin, lé détayé… sak graf lé lokazyon fé myé lot avan, li batay kont li minm. Son goudsèl i permèt ali fé transpir son kréolité, son lang, son rasine dan sak présyon labonm li fé, kiswa in paz listwar, inn ti kozé gramoun… Méo lé partou, zordi si in mir dann somin, domin sou lo pon, aprédomin dann inn ti krwazé... Kwé li vé ? Partazé, sézi domoun, Méo sra touzour in plas ou té atann pa… lèspri grafiti… sirprann !